蕃茄氹氹轉

返黎澳門之後一直都未有將新加坡之旅的後部寫出來, 依家就補充一下先。

完成左新加坡之行後我地並没有即刻返黎, 而係去左檳城玩幾日, 檳城我地之前都冇去過, 所以大家都唔熟。

7月15日, 中午抵達檳城機場後直接坐車到酒店, 酒店座落係海邊, 不過我地既房睇唔到。我地先係酒店附近食飯, 佢地啲食市有啲似新加坡, 美食廣場咁款, 不過就係舊式啲。跟住我地攞住張地圖諗住先行下酒店附近既景點, 地圖上係我地住既酒店附近有一小格放大圖, 我地見到附近似乎都應該有啲野睇下, 所以就跟住地圖搵。行左冇耐我地就發現兩座佛教廟, 係正對面, 一座係泰式, 一座係緬甸式, 兩座都以金色作為主色, 非常搶眼, 大家好似係度鬥搶鏡咁。睇完廟我地繼續向下一點出發, 期間我地行經一條比較繁忙既街道, 人較多, 車多, 兩邊有不少店舖, 但建築物都祇是一些祇有兩座高的舊建築。我們沿地圖的指示行才發現原來地圖所顯示的比例比我們想像中的要大, 行左好耐先行到一條街, 仲要去到啲位係搵唔到啲景點, 後尾搵到個舊總督府, 但係就祗見個門口同個大花園, 入唔到去, 又睇唔到啲咩, 結果我地祇係行左地圖果一小格既一半, 但係就足足唔停咁行左成四五個鐘至行到返酒店, 真係累死, 俾張地圖呃左, 行餐死。其實我地途中已經開始累, 但係我地發覺尼度啲交通設施同人行設備好差, 我地一路行有好多地方都冇人行, 但係車路就有好多車使過, 不過好少見到的士同巴士, 所以冇辦法搭車返酒店。好多路段祇有花圃草皮冇行人路, 有時甚至要行出馬路, 行幾個鐘祇見一條斑馬線同紅綠燈, 但係好耐至轉一次燈俾人過, 巴士站好少, 而且站內除左廣告外, 冇任何指示, 唔知有咩巴, 唔知會經邊, 都唔知點搭。佢同我講呢度政府因為要發展國內汽車業, 鼓勵買車, 所以家家戶戶都有車, 於是公交就做得差。

7月16日, 佢約左係檳城唯一認識的朋友食飯, 所以我地中午至出門, 佢朋友有車於是就車我地去食野同睇風景。佢帶我地去食野既地方主要都係啲舊式美食廣場, 相信呢啲係呢度既主要特式, 食物也是以一些福建河粉、叻沙、粿條為較出名, 至於味道方面我認為非太突出。但最有印象的是食榴槤, 平時我是不吃榴槤的, 但由於當地榴槤出名, 他朋友誠意拳拳車我地到一處海邊路, 路邊有一小販將幾個榴槤直接放在地下售買, 他選了一個, 叫小販打開, 然後我們手也没洗便直接拿來吃, 由於不好意思推摚, 我也拿了一大塊來吃, 一向對榴槤沒好感的我, 小心的小口小口吃, 還好這個榴槤氣味不臭, 食下去還可以, 因為本身對榴槤反感, 所以好不容易才吃下那一大塊。然後他不帶我們去了幾個北部的景點, 不知是他趕時間, 又想帶我們多看幾個地方? 還是因為每個景點都没甚麼要特別仔細觀賞之處?他總是很快便帶我們離開, 最後由於他還有事要做, 便在喬治市放下我們, 讓我們慢慢行。喬治市其實是一個小社區, 在上年也成為了世界文化遺產城區, 由於馬來西亞曾經也是英國的殖民地, 而檳城亦是他們聚居的其中一地, 再加上這裡有很多不同地方的移民, 像是華人、印度人、泰國人、緬甸人等, 所以在這裡的古建築除了西式教堂, 行政大樓等外, 還有中國民間廟宇、清真寺、泰式及緬式廟宇等, 其中以西式建築及中式廟宇最為突出。由於我們到喬治市時時間已是四五點, 很多文化建築點都差不多關門, 所以最後很多景點都亦能在門外觀賞了。另外我們還到了喬治市的東岸, 那裡有早期來自福建的幾個姓氏家族還在這裡沿岸撘起一排排整齊的屋, 在水上居住了下來。

7月17日, 由於我們認為當地的交通實在太不方便了, 要不然自己租車, 要不然參加一下當地的旅行團, 為了減少煩麻, 而且佢約左昨天的那位朋友今晚一起吃飯, 所以我們參加了半日環島遊。檳城島可以半天的時間環島一週兼停幾個景點, 可想而知, 它並不大。半天遊的行程包括買豆蔻油、參觀馬來花布印制、蛇廟、珠寶生產等, 雖然並沒甚麼特別或驚喜之處, 但風趣的導遊令旅程生息不少。中午旅程結束後, 我們到檳城最新最大的購物中心行左陣, 同一般城市的商場差唔多。下午我地就返酒店休息, 等到夜晚再同佢個朋友同佢太太一齊食飯。係呢度泊車, 無論有否咪錶都要收費, 因為呢度有駝地負責停車收費的, 無論你停係咩地方, 都會有人寫張單俾你, 你可以取車時直接將錢交給抄單的人, 幸好他們都是定額收費的。食過一個月以來最豐盛的晚飯後, 他們還有我們到喬治市一間沿海的酒吧飲野, 這裡其實他們也没到過, 也許是因為他倆年紀不少, 而且都是文化教育人士, 所以平常根本不會到這種地方。這酒吧在一個很有特色的環境中, 地下是較嘈的酒吧, 樓上則是較靜的西餐廳, 我們坐係上層露天位置, 可以飽灠海景, 又可以睇到沿岸的西式建築, 感覺好正。

7月18日, 我地參加左個一日團去浮羅交怡, 睇到旅遊資訊知道有團去, 而我地原先都有考慮去浮羅交怡, 所以就參加一日團去睇下, 由朝早八點係酒店出發, 八點半到碼頭, 呢個碼頭感覺好奇怪, 因為簡陋得完全唔見有候船室、售票處同洗手間, 祇係係一個角落見到有張枱, 有啲人, 因為係跟團, 我地無須自行購買, 旅行社的人在一旁拿了貼紙及船票便指引我們上船。由於事前已經知道坐船到浮羅交怡要兩個半鐘頭船, 雖然係心理上已經做左準備, 但上船後好快就抵受唔住風浪, 想嘔了, 船倉的冷氣大, 雖然並不算很搖, 但就令人很不適, 強忍一個鐘頭後, 我發現船尾有門口可以出倉外, 於是同佢一齊出去, 結果我一出去跑到上樓就捉住欄干將早餐送左俾大海。後來連佢都忍唔住嘔左兩次, 係船倉外, 太陽並不很猛, 有海風吹送感覺好多了, 直至差不多到岸我們才返回船倉。差不多三個鐘頭的船程, 落地時還有點腳步浮浮, 我們又登上了車, 接我們的祇是位司機, 原來我們這一團祇有六個人, 另外四個是來自杜拜的兩對夫婦, 兩個女的都穿上傳統穆斯林的黑色長衣、裏頭, 但並没有蒙面。而我則是穿著粉紅小背心, 對比很強烈。到達碼頭已經是中午了, 司機先帶我們去食午飯, 没想到我們的團餐居然是麥當勞餐一份, 真是意想不到。食完午餐我地坐太約半個鐘到第一景點--海洋世界, 睇海洋生物...入場費四十幾蚊馬幣自費, 居然係自費, 因為報團既時候冇問清楚, 算啦俾就俾啦, 限時一個鐘頭, 除左有企鵝外, 其他冇咩特別, 準時咁睇完出黎, 不過就唔見左同團果四個人, 搞到個司機搵左半粒鐘, 原來係手信區買野唔捨得走。跟住再去第二個景點--坐鑬車上山睇風景, 由於之前擔誤左啲時間, 今次得番九個字要鑬車上落同睇風景, 所以要快啲快啲, 買左飛即刻排隊上鑬車, 都係自費, 位位三十。好彩唔係太多人, 鑬車有兩站, 司機話第二站上到山頂會比較好睇, 於是我地直接上到頂至落車, 落車後即上上面人工瞭望台, 好快咁望完一圈影兩張相, 又落下面個架空天橋, 連接兩個山頭, 因為要上落多層樓梯, 又冇時間, 所以天橋祇走一半就折反, 坐鑬車返落去。今次團友都準時到集合點, 不過司機遲左幾分鐘, 才差不多四點我們便完成景點要返碼頭, 返到碼頭未夠五鐘, 司機見仲有少少時間帶我地到碼頭則的地標廣場影兩張相就走啦, 五點半左右開船, 繼續差唔多三個鐘既船程, 今次我地醒喇, 一上船就搵個倉門, 等到開船一段時間後, 出得倉外, 我地就走出去坐, 今次幾乎全程都可以吹風就舒服好多, 我甚至可以睇陣報紙都唔頭暈, 我地仲見到好靚既日落。返到酒店已經八點幾。諗返成日行程主要係車、船、車、船同車, 成程十二個鐘頭0係兩個景點加埋兩個鐘都唔夠, 兩個人團費連入場費就使左千幾蚊澳門幣, 真係好唔抵, 仲要攞苦黎辛。都唔知咩人度埋晒啲咁既團, 仲要有啲好似我地咁既傻佬參加, 真係........

7月19日中午坐飛機返澳門。
總結今次檳城同浮羅交怡之旅, 檳城係一個發展中地區, 有好多野都唔完善, 好似交通, 行人設施等, 但就保留左唔少舊城市既特色, 舊街道、舊建築都保存得好好,  呢啲都係我最欣賞既。但係另一方面呢度既治安就較令人擔心, 旅遊配套亦唔完善。而且空氣質素較差, 在檳城幾天都像廣州那樣, 灰灰蒙蒙的, 祇有到浮羅交怡那天才看到美麗的藍天白雲。

突然要搬屋, 下星期就搬新屋。由全山景搬到半山景+半樓景, 由三樓搬到對面七樓, 雖然租貴左, 但裝修好左。唔使對住發霉起泡既牆, 唔使成日水渠滴水同塞住, 唔使廚房黑沈沈。不過要拾屋。

其實今次搬屋真係有啲突然, 事關雖然自從搬入黎後就不時向佢抱怨間屋尼度唔好, 果度唔好, 想佢整整間屋。但係屋係租返黎, 佢又唔想花錢, 要叫人黎整小小野又好麻煩, 而且尼度雖然遠啲, 不過佢好鐘意, 我都覺得尼度環境幾好。早排佢突然提出不如年底搬, 我覺得都OK, 事關已經有好多野殘殘舊舊, 唔想整, 搬都好既。

早幾日佢突然又話想早啲搬, 就打俾個經紀, 即日就睇左三間同村既單位, 都係重裝過既。第二日我地再睇多次兩個較平既單位就決定要最平果個, 不過租金都比依家貴, 個單位裝修後祇係有個外國人住過兩個月, 所以仲好新淨, 係我地住緊既對面, 一望就望到。個經紀仲想我地快啲搬, 因為同依家住緊果度同一個經紀, 所以舊單位既租期等問題都唔使理就OK, 所以就決定係12號前, 即原本交租期搬走, 所以搬得好急, 不過今日拾野進度都幾好, 下星期走得。

不過因為重裝過, 原本有既露台冇左(變左廳既一部份), 有啲可惜, 但係個廚房就大左, 個爐頭同櫥樻靚左好多。因為原先既傢私仲用得, 個經紀又俾我地搬埋啲舊傢私走, 所以傢私都會搬返過去用, 唔使買新野, 新屋已經有冷氣、熱水爐同洗衣機, 尼啲就唔使煩。

 

 

新加坡係一個小島國, 天然資源缺乏, 包括水源。現時新加坡同澳門一樣食用水主要是外購的, 而他們是從馬來亞西購來的。 由於没有水源, 所以新加坡的大大小小蓄水池有十多個之多。而今日我地就去其中一個麥里芝蓄水池, 以面積計算這個算是較小的一個, 尼度有啲似路環水庫, 周圍係山林, 旁邊仲有個大型高爾夫場, 山林中有步行徑。冇錯, 我地今日係去行步行徑....

因為一早已經知道要完成尼條步行徑要行成四個鐘頭, 所以我地一早就做足準備功夫, 包括係準備愛心三文治、帶足夠水, 仲有係心理準備, 因為對於係小城市生活既我, 要連續行四個鐘, 真係唔少野。整個步行徑差唔多有十一公里, 佢話兩三年前曾參加過超級馬拉松, 就跑過尼度, 最高紀錄佢用9個鐘頭跑左5個圈, 嘩, 真係勁丫~~

尼個蓄水池平日都開放俾啲人係度學獨木舟, 我地黎到時都有唔少人玩緊, 個蓄水池就好似一個湖咁, 同大自然結合得好好, 我地行左一段路就進入步行徑, 步行徑係一條小道, 兩邊大樹將小道都遮左, 所以一啲都唔曬, 好似入左個樹林咁, 周圍都係林木, 有好大段路沿途除左樹之外都冇咩特別, 不過我地今日主要係行步行徑, 唔係睇風景, 所以冇所謂啦。但係其間我地都發現大蜥蜴、猴子、同蛇(果條蛇真係俾佢嚇死, 搞到我連續高聲叫左十幾秒至停到落黎, 佢雖然個身大約祇有一隻手指公咁粗, 但係有成7、80cm長, 而且顏色都幾鮮艷, 重要係正條步行徑則邊, 好彩佢之後慢慢行開, 唔係都唔知點過。)跟住我地仲行左去條有成250m長既吊索橋度, 後尾果段路就比較開揚, 因為係高爾夫場側, 啲樹冇咁多、又矮, 可以睇到一大片草原(其實係高爾夫場)又可以欣賞湖景, 再加上藍天白雲, 景致真優美, 但係就要行成差唔多3個鐘至可以欣賞到尼段風光。最後我地行左差唔多10公里, 3個半鐘左右既時間, 係其中一個接近馬路既出口走人, 完成左今日既行程。

一直以黎我都唔係太常係夜晚出動, 以前細個讀書果時都仲試過同朋友仔玩天光, 讀理工又試過做功課過天光, 不過之後都冇咩點浦囉。

前晚我同佢就去左夜間動物園, 動物園成7點半至開門, 所以我地6點幾出門, 不過原來路程都幾長, 我地差唔多8點至到。夜間動物園真係好夜間, 動物園既燈光都好昏暗, 我地先坐遊灠車, 遊左半個圈, 期間兩旁都有唔少動物, 但係因為實在太暗啦, 根本就睇唔清動物個樣, 我甚至懷疑啲動物係咪假架, 都睇唔真, 有啲又好似祇係重覆一個小動作。跟住有一段路我地落車行, 係叢林入面柒黑一片, 跟住啲指示睇一啲動物, 有啲會用玻璃隔住, 例如犳、虎, 有啲就係間用網圍住既空間入面, 例如蝙蝠等。有啲就祇係有啲小欄杆欄住, 不過無論你睇咩動物都好, 都真係好考你眼力, 特別係夜間視力, 說真的, 這方面我不太好, 所以真係睇得幾累。跟住我地再坐游灠車, 游埋果半個圈, 尼次睇到既動物就多啲, 而且好似清楚啲, 可能係開始習慣係黑夜中睇野。游完灠車已經差唔多10點, 都係時候返去啦, 雖然仲有啲地方冇去, 但係因為已經買左回程返地鐵站既票, 而且佢同我都已經累了。

我地都唔係夜間動動, 佢比我更甚, 回程時大家都已經開始眼瞓~~

這趟夜間之旅花了$80坡幣(大約港幣$450, 兩個人), 感覺不是很值, 連野食都冇買, 又睇唔真啲動物(尼個係最差), 就用左咁多錢啦。

 

後話, 其實新加坡仲有個日間動物園係夜間動物園隔離, 佢講笑咁話, 唔知D動物會唔會係日頭係果邊, 夜晚係尼邊, 咁佢地都幾累啫, 哈哈, 夜間動物園D動物其實有唔少都係日間都活動, 好似大象、長頸鹿、班馬等, 唔知點解都走晒黎夜間動物園呢......

尋晚同佢去左坐世界最大既摩天輪, 個車廂最多可以容納十幾廿人, 好彩我地去既時候唔係太多人, 個車廂祇得幾個人, 可以輕易隨處走動。摩天輪最高處有165米, 位於新加坡的東面沿岸, 可以飽灠沿岸風光, 不過新加坡的夜景始終不及香港。可這半個鐘頭的幸福摩天輪一點也不平宜, 位位$29.5坡幣(差不多是港幣$160), 而且交通也不是方便, 除非是直接坐的士, 否則在最近的地鐵站下車後, 還得走半小時才到。摩天輪下面是一個商場, 有餐廳、商店也有7仔，新加坡的綠化做得不錯, 到處都是樹木, 連摩天輪的底下也有個小森林, 往往給人一種別有洞天的感覺。

 

前兩日, 我地仲去左聖淘沙, 原來佢已經係第四次去, 所以並冇咩特別期待, 祇係諗住黎到新加坡, 總得去一啲景點, 其實我上次也有去, 上次係同一班朋友去, 仲要係新加坡國慶日去, 我地知道果日會有煙花放, 所以日頭係島上玩, 行沙灘, 欣賞黃昏, 然後再夾好放煙花時間坐上灠車靜候煙花的來臨, 雖然煙花最後遲左幾分鐘先放, 但幸好我們還能看到, 真係一個美好既回憶。

尼次佢事先訂左間酒店, 我地打算係度過一晚, 所以到中午食完飯先至入去, 入去後因為仲係中午時段, 天氣太熱, 所以我地先係酒店休息一陣, 等到三四點至出去玩, 其實尼度有好多設施對我地黎講都冇咩特別, 所以我地冇特登去排隊玩, 而且係逐樣收費, 唔玩就唔使俾錢, 咁都幾好丫。我地祇係沙灘走走, 散散步, 感受一下不太強烈的陽光、海水和沙, 幾咁浪漫。因為我唔識游水, 所以我地並冇到沙灘游, 反而係食完晚飯後, 返酒店個泳沲游, 其實我都祇係陪佢泡泡水, 因為我實在怕水, 不夠膽亂黎, 不過可以同佢一齊都幾好玩。

第二日起身, 係酒店食玩早餐, 再周圍行下, 係我地住晚酒店隔離係一間旅游學校, 間學校以前係個英軍兵營, 都算係古積。行到咁上下有啲曬, 跟住是旦坐上一部穿梭巴士到處遊灠, 免費的, 怪不得他說: 聖淘沙這個項目不贊錢。

大熱天時想晒黑簡直易如反掌, 但係如想晒得有意思可以好似我地咁。

找一個陽光普照的日子, 跟他到位於新加坡東北面的一個小島"鳥敏島", 據說面積比路環要大, 在樟宜村坐渡輪幾分鐘就到, 渡輪$2.5坡幣, 再花$12坡幣租一部可以玩足一日既單車, 沿著小徑一直踏, 可以飽灠島上風光, 放下單車徒步走幾分鐘可以到達紅樹林區, 若有閒情更可找尋一下泥灘動植物, 還可在架空海面長逹二百米的橋上欣賞海景及回望紅樹林。

繼續單車旅程, 可發現島上的野豬以及巨蜥在身邊走過, 若你夠膽更可以採下樹上的椰子、蓅蓮、紅毛丹等野果解渴充飢, 不過為生態著想, 我們當然没有這樣做。

由於全程祇有數個凉亭, 天氣熱而且踏單車具一定運動量, 所以一定要準備充足的水。 平日少運動的我堅持了半天就受不了, 在碼頭附近吃過午飯, 再踏一會便離開了。這裏是一家大小效遊的好地方, 不少人都是一家人一起來的, 有的更自備單車。

尋晚九點到達新加坡，第一時間返旅館，我地住既係住宅式旅店，有開放式既廳、廚房、房同書枱，仲有洗衣機，而且可以上網，都算唔錯，不過價錢一啲都唔平，佢話係因為同我一齊至會租呢啲喎。

今朝一早同佢去左佢返工既地方，先係佢返去同啲舊朋友&同事打聲招呼，而我就係附近逛下，今朝天氣都唔錯，不過有啲熱又有啲晒，我走入SINGAPORE BOTANIC GARSENS，開初唔知，一路行至發覺入面都幾大，而且環境幾靚，行左個幾鐘出番至行得半個公園咋，下次再去睇下其他果啲先。

仲有四日就要去新加坡啦~~ 去新加坡唔係第一次, 但今次唔同既係我同佢去, 因為佢要去做野, 所以我地會逗留成個月, 所以今次應該可以好好咁睇清楚呢個地方。

從未試過離開生活既地方咁耐, 今次應該會係一個好好既經歷, 而且佢都好想離開澳門一段較長既時間, 所以大家都好期待, 希望呢個旅程愉快同順利啦!!