去過台灣幾次, 今次係第一次去高雄, 雖然台灣我都祇不過係去過台北同花蓮, 而呢次高雄給我既感覺唔錯, 比起台北同花蓮我較喜歡高雄, 雖然高雄地方唔大, 但係作為悠閒旅遊, 短短逗留三兩日都唔錯, 高雄景點雖然唔多, 但係勝在當地人很有善、又有禮貌, 而且遊客唔多, 行得安心又舒服, 另外交通又方便, 飛機可以直達, 市內又有地鐵同火車真係好方便。高雄既消費亦相對較低, 而且食物都唔錯, 又有多個夜市, 環境衛生又做得好。
今次係高雄逗留四日三夜, 期間花左大半日坐火車去台南走了一轉, 遊了個安平古堡, 除了左係安平古堡會覺得係旅遊區, 好多遊客外, 係高雄市都冇見到咁多人。高雄既主要景點我地有興趣既都去晒, 第一日下午落機, 就去火車站附近走左一圈, 然後沿住中山一路走到六合夜市, 夜市既小食認真唔錯.....
第二日我地坐地鐵去到西子灣, 係西子灣租左單車睇住小地圖周圍踏, 租單車祇係要100台幣就可以玩足一日, 我地穿過西子灣隧道, 去到中大, 再到沙灘, 跟住去搵英國領事館, 因為領事館係山上, 我地差啲就MISS左佢, 事關佢係間廟隔離, 我指住山上問BILL會唔會係果度, 佢話你想睇廟咩, 我話唔想, 跟住我地就繼續沿路踏, 但係冇幾耐我就覺得唔對勁, 叫佢問下人先, 果然就係之前見到既地方。跟住我地仲踏單車坐渡輪去旗津半島, 係旗津北面沿住踏風小徑一直走, 再上燈塔, 落山後, 再係旗津遊左小半圈, 就返西子灣還車。跟住我地就行去駁二藝術區, 沿途仲穿越有成十幾廿條路軌既地方, 有啲似電影中既場景, 然去左豆皮咖啡飲下午茶, 跟住天黑了行去愛河, 坐船遊左半圈, 發現音樂館果邊有啲活動, 遊玩船就過去睇左一下, 之後經過歷史館, 發覺仲未關門, 而且免費, 所以又入去走走, 跟住隨便搵左個小店食完野就返酒店。
第三日一早出門坐火車去台南, 落火車後直接坐的士去安平古堡, 幸好我地去既時候較早, 人唔算太多, 可以慢慢遊逛, 跟住係古堡周邊遊了一下, 睇下其他景點, 中午時份去返古堡側既老街已經好多人, 食完中午, 就行左一陣橫街就返高雄。跟住我地去左巨蛋隔離係高雄最新最大既百貨公司, 人流算係喺高雄見到最多既一日, 可能係因為百貨公司做緊大減價, 我地都忍唔住手買左兩對鞋, 跟住就到百貨公司對面飲杯野休息一下, 然後就去附近既夜市吃火煱, 兩個人都係二百幾蚊台幣。最後我地仲上埋85大樓睇夜景。
第四日, 已經唔知去邊好, 星期一美術館又休息, 下午三點幾機, 太早好多地方都未開門, 不過糖廠舊址就好早開門, 而且免費入場, 所以我地就去坐糖廠走走, 都幾特别既一個地方, 而且都幾大下, 如果要仔細睇, 再影影相, 都要半日, 糖廠除左係台灣最大糖廠舊址, 仲係糖業歷史發展同制造既博物館。跟住返酒店附近食午餐, 就去機場坐飛機返黎, 完成呢次旅程。