今次去山頂同迪士尼, 兩個地方我都冇去過, 證明我真係好少去香港。呢次主要係因為佢要去迪士尼參加半程馬拉松, 所以陪佢兼順道玩下, 其實我並冇陪佢跑馬拉松, 祇係搵多個籍口去玩下, 本身都有諗過好唔好去陪下佢呢?但係因為太早啦, 要五六點起身, 對於已經習慣遲起身既我, 實在有啲困難, 所以最後都係留係酒店瞓到夠先, 哈哈。
我地今次因為要就佢星期日跑, 所以星期六一早就過去, 落船後直接坐的士到中環覽車站,  去到車站就有人同我地推介啲覽車套票, 因為山頂除左覽車, 我就祇知道臘像館, 所以我堅持要去, 於是我地就買左覽車連臘像館既套票。臘像館內面有好多名人同名星, 不過始終都係明星吸引我多啲, 從來都冇同明星影過相既我, 當然唔會錯過同佢地既近距離接觸啦, 我除左彈琴俾朗朗聽之外, 仲坐Leon單車尾, 又同珊珊合照, 不過最開心係差啲摩到Aaron既胸肌, 真係超開心, 不過最搞野都係佢居然走去同姚明搶籃板球.......
食過午餐後, 我們係山頂行左陣, 之後等佢攞完號碼布就轉車直入迪士尼, 原本佢訂左間平啲既荷里活酒店, 但係去到我地好好彩, 俾我妹講中俾佢地UPGRADE左去貴啲既迪士尼酒店, 兩間相比之下, 迪士尼酒店就係別緻好多, 我地果間房係喺地下, 可以望到後花園, 房後面有個平台同花園相連, 房入面有一張大床同一張梳發床, 一家四口來都得, 酒店印有迪士尼圖案既房卡同拖鞋都可以俾客人帶走作為小禮物, 真係唔錯。
因為住埋酒店所以買門票可以買一張入兩日, 所以我地趁住天黑前入去可以先玩一陣, 再睇放煙花, 因為已經就快聖誕, 所以入面已經整晒啲聖誕裝飾, 一入到去就啱啱好見到巡遊, 跟住又落住雪, 都幾浪漫, 食左野玩左一陣就睇煙花, 加埋個特效眼鏡真係幾精彩, 仲好過癮, 好多雪人係空中跳舞。
第二日一早天都未光, 佢就起身, 因為六點幾就要集合, 而我就繼續大覺瞓, 等佢番黎。九點幾十點等佢番黎之後, 我地先係酒店逛下, 睇下。跟住再入迪士尼, 今次因為近門口果邊前一晚都行過, 所以就直接坐遊覽火車到另一邊, 由另一邊開始玩, 但係由於我平時少運動, 又少去玩所以積累左前一日的體力, 所以好快已經覺得有啲累, 而佢就唔使講啦, 朝早跑完半程, 其實都好辛苦, 仲要陪我玩, 所以我地呢半日既活動超慢。
玩完迪士尼我地仲去左陣旺角先至返屋企, 真係好累丫~~不過成個行程都好好玩同好開心。